Thursday 25 September 2014

nasib kaban tanei di negaro-si co ulun-agraris

nayah penduduk gham ijo si jadei tanei. wajar gaweh lamun negaro gham ijo diyau negaro agraris. ulah ino munih nayah pelaut anjak luah megegh ulah ago dagang di jo. lamun sangun payeu lah negaro gham diyau ken negaro agraris. anying tano?

nayah masalah sai diadepei tanei gham tano. dapek jadei tigeh seterusno naen. si ngeghaso ayen tanei no gaweh. unyen gham akhirno ngesoken unyen. ulah gham perleu mengan. nyo sai dikan gham asalno anjak tanei.

masalah-masalah tenei gham tano

 
 
1. lahan nambah gelik
kaban penduduk sai nambah nayah, akhirno pembangunan munih nambah nayah. ijo lah si guai lahan nambah cutik. ulun-ulun si ngemik lahan kalo mak dapek mak ngejual taneh tiyan. ulah nayah alesan, tiyan terpaksa ngejual taneh tiyan. taneh tiyan inolah si dipakai makai guai kaban bangunan. si teghaso temen lamun lahan makin cutik, hasil tanei munih cutik. kaban tanei susah ago nanem.

 
 
2. bibit, pupuk, jamo pestisida mahhal
ago nanem, tanei perleu bibit, bangei taneman cepet balak jamo tahan hama diperleuke munih pupuk jamo pestisida. anying unyen ino mahhal. gham iling nengei beghitto ijo di tv. kaban instansi terkait harusno dapek nyelesaike masalah ijo. masalah ijo tano kak parah. dang tigeh nambah parah.

 

3.struktur taneh kak jahhel
ulah anjak sangun makai pupuk jamo pestisida. tano dampak jahhelno kak mulai teghaso. struktur taneh tano kak mak wawai lagei. kaban perusahaan-petusahaan sai guai wat tano munih nayah si ngumban limbah basang-basing. ino munih guai taneh jadei jahhel.


4. sosialisasi teknologi kurang
teknologi si tambah majeu, ngemik pengaruhno munih jamo pertanian. nayah penemuan-penemuan, sistem pertanian, bibit unggul, sarana prasarana. dis unyen ino dapek dipakai jamo kaban tanei gham. anying mak unyen tanei pandai caro makino. lagi nayah tanei si makai caro-caro ghebei. dampakno di hasil pertanian tanei gham munih. ibaratno, ulun luar kak gelik makai traktur, tanei gham lagi makai sapei makai ngebajak sawah.

 

5. hasil panin dijual murah
matei sakik, duit nayah si luah anying pemasukan malah cutik. pas dibelei jamo pengusaha, kaban tanei meso duit cutik. anying pas tigeh di pasar, igono dapek mahhal jaweh. ago balik mudal gaweh susah. nyo caro ago uttung.