Tuesday, 3 June 2014

Pek Sai Wawai Hagia Sophia



Hagia Sophia sun salah sateu pek wisata di Turki sai wawai lamun ago dak nei. Lokaseino di Archeological Park di Istanbul, Turki, Hagia Sophia jamo bangunan baghih gah Masjid Sultanahmed, Basilica Cistern, jamo Topkapi Palace, kanjak 1985 jamo UNESCO  ditetapke jadei salah sateu waghisan budayo dunio sai harus dilindungei.

Hagia Sophia atau dikenal munih namono Aya Sofiya, ngejamuk  nayah sejarah di masa Kekaisaran Byzantium. Dibangun di unggak taneh sai beghakno 70 miter jamo geccak 75 miter mik dome (kubah) bediameter 31 miter, bangunan ijo dapek diyau megah temen.

Di tahhun 306 di masa Kekaisaran Byzantium, di kota Konstantinopel sai merupakan cikal bakal kota Istanbul, Gereja Konstantin dibangun. Lokasei Gereja Konstantin ijo lah sai merupakan lokasei Gereja Hagia Sophia. Selakwak jadei gereja, Lokasei Gereja Konstantin ino awalno munih merupakan pek penyembahan masyarakat. Jadei, lokasei Hagia Sophia sun merupakan lokasei sai ngejamuk nayah ceghito sangun tentang kehidupan beragama menusia di jaman ho.

Di tahhun 404, terjadei kerusuhan di Konstantinopel. Perusuh muppul gelagh gaweh termasuk Gereja Konstantin. Kerusuhan ino guai bangunan Gereja Konstantin cadang parah. Ghadeu ino, di tahhun 405 Theodosius II ngayun ngebangun gereja kupak. Anying sayang, gereja harus cadang kupek uleh kerusuhan Nika di tahhun 532.

Justinian sai pas ino jadei kaisar di Konstaninopel merintahken Anthemius jamo Isidor ngebangun gereja kupek. Anthemius jamo Isidor ijo sitemenno ayen arsitek. Anthemius ahlei Matematika jamo Fisika sementara Isidor ijo ahlei Geometri jamo Mesin. Menarikno, tiyan wo mak ngemik pengalaman lem hal arsitek.

Selama pembangunan Gereja ino, Justinian meghittek ngebangun gereja makai dome sai balak temen. Guai ngewujudke impian Justinian, ditulung sepuluh ghibuan tukang, Anthemius jamo Isidor kerjo keras.

Bahan bangunan dibelei anjak berbagai negaro gah Syria jamo Mesir makai guai bangunan sesuai harapan jamo megah. Selain ino, bahan bangunan munih dirancang sedemikian rupa bangei dapet meso bangunan kuat jamo kokoh temen. Makai seminno, bateu bato penyangga bangunan diguai anjak taneh liak si dipuppul makai teknik pembakaran tertentu guai bateu batono lebih solid. Taneh liak, semin jamo pasik makai bahan si guai bangunan ino kuat jamo tahan gempa.

Tigeh akhirno, tahhun 537 bangunan gereja ino ghadeu diguai. Bangunan Hagia Sophia di masa inolah sai diyakinei tigeh tano ijo dapek dinah kemegahanno.

Anying sayang, gempa bumei melanda Turki tahhun 553 jamo 557. Gempa bumei ino nyebabke bangunan ino cadang parah. Attan dome si megah si diameterno 31 miter ino accur.

Isidorus, naken anjak Isidor, nulung ngebangun kupek dome si kak accur. Dideh rancangan Isidorus, dome diguai lebih geccak kupek jadei 6,5 miter. Pondaseino diwawaei kupek, jadei bangunan lebih kuat. Kolom-kolom penyanggano makai marmer bangei bangunanno kuat.

Tigeh akhirno Hagia Sophia dibuka kupek sebagai gereja jak Kristen Ortodoks di akhir tahhun 562.
Anying, gempa bumei bekali-kalei ngeguncang Turki. Gempa bumi si keduo di tahhun 869 guai dome Hagia Sophia retek. Ghadeu ino, atas permintaan Kaisar Basil I direnovasi. Malangno, di tahhun 989, gempa melanda Turki kupek. Tano, dome cadang kupek. Selanjutno di masa Kaisar Basil, dideh arsitek Trdat dome diwawaei kupek si kesekian kalei ino.

Gempa si tejadei tahhun 1344 jamo1346 munih nyadang. Najin ghadeu ino diwawaei arsitek Atras jamo Peralta, kanjak san, gereja ditutup.

Tahhun 1453, ghadeu Konstantinopel berhasil dikalahei jamo Mehmet II, Kaisar Ottoman, Hagia Sophia jadei mesjid. Ghadeu ino, renovasi lunik ngubah gereja jadei masjid diguai. Gah guai mihrab. Gambar-gambar di interior munih direnovasi jadei nyaman guai muslim si beribadah. Munih nambah perpustakaan.

Ayen ino gaweh, bangunanno pun dikuatei. Di masa Sultan Selim II di akhir abad ke-16, anjak tulungan arsitek Sinan, bagian luah Hagia Sophia dibangun struktur makai penyangga. Ghadeu ino munih nambah menara di sebelah barat jamo di tenggara bangunan. Selanjutno, wo menara baghih ditambah di masa Murad III jamo Mehmed III.

Kanjak 1935, Hagia Sophia diubah jadei Museum oleh Mustafa Kemal Ataturk, pendiri Republik Turki.
Nyusurei nggal sudut Hagia Sophia sun menarik. Bangunan si pagun kokoh jadei buktei kehibatan arsitektur jaman ho. Kehibatan ulun-ulun jaman ho si ago mikir  ngewujudke impian si dapek dighaso kaban generasei tano jamo masa depan.

Di lingkungan Archeological Park kak dibangun taman anying mak ngubah bentuk aslei anjak bangunan-bangunan asli. Ijo semata bangei menjaga kenyamanan wisatawan si ago bekunjung adek lokasei Archeological Park. Mak cuman di dawah metting, anying munih debingei. Jadei pengunjung pagun dapek ngenah keindahan lokasei kawasan arkeologi ino najin debingei.
Comments
0 Comments

No comments: